د پانګونې بین الوزارتي کمېټه
معرفي:
د پانګونې بین الوزارتي کمېټه د افغانستان اسلامي امارت د اقتصادي کمېسیون د ۱۴۴۵ هجري قمري کال د دويمې ګڼې مصوبې پر بنسټ د پانګونې چارو د اسانتیا، همغږۍ او نظارت په موخه د ریاست الوزراء اقتصادي معاونیت تر چتر لاندې رامنځته شوه، چې (۲۰) وزارتونه او امارتي ادارې یې دایمي غړیتوب لري.
د پانګونې بین الوزارتي کمېټې موخــې:
۱- د کورنۍ او بهرنۍ پانګونې جلب او جذب؛
۲- تر واحد چتر لاندې د کورنۍ او بهرنۍ پانګونې د طرحو طی مراحل؛
۳- په هېواد کې د پانګونې له پاره د مناسب چاپېریال رامنځته کول؛
۴- د پانګونې چارو ښه مدیریت له پاره زمینه برابرو؛
۵- د پانګونې پروسو کې د چټکتیا، لاروڼتیا او چارو ښه مدیریت؛
۶- د امارتي ادارو او خصوصي سکټور ترمنځ د ښې همغږۍ رامنځته کول؛
۷- په افغانستان کې د پانګونې پروژو په اړه پانګوالو ته د لازمو معلوماتو چمتو کول.
فعالیتونه او لاسته راوړنې:
د پانګونې بین الوزارتي کمېټې تر اوسه پورې په برېښنايي، ساختماني، کرنیز او ترانسپورټي سکټورونو کې د میلیاردونو افغانیو په ارزښت پانګونه جلب او جذب کړې چې چارې یې عملاً جریان لري او په پایله کې یې سلګونو هېوداوالو ته په مستقیم او غیر مستقیم ډول کاري زمینه برابره شوې ده. همدا راز د هېواد په بېلا بېلو زیربنایي سکټورونو لکه د برېښنا تولید، ساختماني، کرنې، صنعت، معلوماتي ټکنالوژۍ، روغتیا، نفتي توکو او ترانسپورټ کې د پانګونې پروژو طرحې تر پروسس لاندې دي چې په لنډ وخت کې به یې رسمي چارې نهایي شي.