د ریاستالوزراء اقتصادي مرستیال د جلال آباد له ۱۰۰۰ بستریز روغتون څخه لیدنه وکړه
د ریاستالوزراء اقتصادي مرستیال محترم ملا عبدالغني برادر اخوند ننګرهار ولایت ته د خپل سفر په ترڅ کې د روان لمریز کال د جدې میاشتې په ۲۷مه نېټه په جلال آباد ښار کې د ۱۰۰۰ بستریز روغتون څخه لیدنه وکړه. محترم ملا صاحب له یاد روغتون څخه د لیدنې پرمهال وویل، چې اړوند ادارو ته به د دغه روغتون د پاتې چارو بشپړولو لارښوونه وکړي، څو یې پاتې کارونه په وخت تکمیل او ګټې اخیستنې ته وسپارل شي. د یادونې وړ ده، چې د ننګرهار ۱۰۰۰ بستریز روغتون ۷۰ سلنه چارې ترسره شوې او د پاتې هغو په بشپړېدو سره به یې د ختیځ زون ولسونو روغتیایي ستونزې تر ډېره بریده حل شي.
