د محترم ملا عبدالغني برادر اخوند په مشرۍ لوړپوړی پلاوی ازبیکستان ته له دوه ورځني سفر وروسته کابل ته راستون شو
د ریاستالوزراء اقتصادي مرستیال محترم ملا عبدالغني برادر اخوند په مشرۍ د اسلامي امارت لوړپوړی پلاوی چې په ترکیب کې یې د کابینې یوشمېر محترم غړي او د سکټوري ادارو استازي شامل دي، ازبیکستان ته له دوه ورځني سفر وروسته نن د روان ۱۴۰۳ لمریز کال د کب میاشتې په پنځمه نېټه ماسپښین مهال کابل ته راستون شو. د ریاستالوزراء اقتصادي مرستیال په کابل نړیوال هوايي ډګر کې له رسنیو سره د خبرو پر مهال یاد سفر له لاسته راوړنو ډک وباله او ویې ویل، چې د خپل سفر پرمهال یې د ازبیکستان له لومړي وزیر، د لومړي وزیر له مرستیال او د یوشمېر ادارو له مسوولینو سره وکتل. په دې لیدنو کتنو کې دوی ښه پرمختګونه او بحثونه درلودل چې مهم هغه یې د کرنې، برېښنا، ترانسپورټ، سوداګرۍ او د اوسپنې پټلۍ او نورو برخو کې دي. حاجي ملا صاحب زیاته کړه، د ۵۰۰ کیلوولټ برېښنا مزي غځولو پروژه چې پخوا یې قرارداد په ۲۵۲میلیون ډالرو شوی و، له بحثونو وروسته ازبیکستان دا قرارداد ۲۲۲ میلیون ډالرو ته راټیټ کړ. همداراز یې د اوسپنې پټلۍ په برخه کې وویل چې ډېر ژر به د ازبیکستان د اوسپنې پټلۍ تخنیکي ټیمونه افغانستان ته راشي او له حیرتان څخه به تر هرات پورې د اوسپنې پټلۍ د غځولو لومړني مطالعات پیل او له مطالعاتو وروسته به د ریل پټلۍ عملي چارې پیل کړي، چې د مطالعاتو لګښت یې ازبیکستان ورکوي. حاجي ملا صاحب دا هم وویل چې ازبیکستان به د افغانستان د کرنیزو محصولاتو د صادراتو په برخه کې شته محدودیتونه لرې کړي. له دې سره به ازبیکستان ته د افغانستان د کرنیزو محصولاتو په صادراتو کې زیاتوالی راشي. د ریاستالوزراء اقتصادي مرستیال له ازبیکستان څخه د واردېدونکې برېښنا په اړه وویل، دوی له ازبیکستان سره موافقې ته رسېدلي چې په راتلونکي کال کې به ددغې برېښنا کچه زیاته او تعرفه به یې کمه شي.
