په مختلفو برخو کې د خصوصي سکټور له لوري د پانګونې وړاندې شوو طرحو په اړه بحث وشو
د پانګونې بینالوزارتي کمېټې څلورمه نوبتي غونډه په مرمرینه ماڼۍ کې ترسره او له اجنډا سره سم د کورنیو او بهرنیو پانګونې شرکتونو له لوري د وړاندې شوو پانګونو طرحو په اړه هراړخیز بحث وشو. دغې ناستې ته د کابل ښار په کوټه سنګي سیمه کې د ملت سوداګریز مارکېټ د جوړولو، د هېواد په بندرونو کې د سکنر ماشینونو د نصب، د کابل ښاروالۍ د جامدو کثافاتو د تصفیې لپاره د معیاري فابریکې جوړولو، د جواز سیر او لایسنس الکترونیکي چاپ او همدارنګه د کابل ولایت د پلچرخي سیمه کې د ټولګېټ دروازو جوړولو طرحې د بحث لپاره وړاندې شوې وې، چې تر هراړخیر بحث وروسته د هرې طرحې د تخنیکي او اقتصادي ارزونې لپاره جلا جلا کمېټې وټاکل شوې. یادو کمېټو ته سپارښتنه وشوه چې په ټاکلي وخت خپل راپورونه د بینالوزارتي کمېټې راتلونکو غونډو ته راوړي، څو یې په اړه نهايي تصمیم ونیول شي.
