د افغانستان اقتصادي وضعیت په اړه د نړیوال بانک وروستي راپور په تړاو د ا.ا.ا د ریاست الوزراء اقتصادي معاونیت اعلامیه!
د افغانستان اقتصادي وضعیت په اړه د نړیوال بانک وروستي راپور په تړاو د ا.ا.ا د ریاست الوزراء اقتصادي معاونیت اعلامیه د افغانستان اقتصادي وضعیت په اړه د نړیوال بانک له لوري د ۲۰۲۴ میلادي کال د جنوري میاشتې په ۳۱مه نېټه راپور خپور شوی دی. په دې راپور کې د افغانستان په اقتصادي وضعیت کې رامنځته شویو پرمختګونو ته اشاره شوې ده. په راپور کې ویل شوي چې د ۲۰۲۲ په نسبت په ۲۰۲۳ میلادي کال کې د افغانستان د صادراتو په کچه کې زیاتوالی راغلی دی، د ۲۰۲۲ په پرتله په ۲۰۲۳ میلادي کال کې د بهرنیو اسعارو پر وړاندې د افغانۍارزښت لوړ شوی دی، د خوراکي او غیر خوراکي توکو په بیو کې ټیټوالی راغلی، د ۲۰۲۲ په نسبت په ۲۰۲۳ میلادي کال کې د عوایدو کچه لوړه شوې او ددې ټولو په خوا کې د وارداتو اندازه هم پورته شوې، له دې څخه جوتیږي چې په افغانستان کې د خلکو د پېر توان زیات شوی دی. د افغانستان اسلامي امارت د ریاست الوزراء اقتصادي معاونیت د دغه راپور هغه برخې چې مثبتې او پر واقعیتونو ولاړې دي، ستایي او هغه برخې چې له عیني واقعیتونو څخه لرې دي، ردوي. د ریاست الوزراء اقتصادي معاونیت د نړیوال بانک په څېر نړېوالو بنسټونو څخه غواړي چې د افغانستان په اړه په خپلو راپورونو کې عیني واقعیتونه منعکس کړي. د افغانستان اسلامي امارت پر دې باور دی که نړیواله ټولنه مثبت تعامل ته مخه، بندیزونه لرې او د افغانستان کنګل شوې شتمني ازاده کړي، نو افغانستان به د نورو برخو ترڅنګ په اقتصادي برخه کې په بشپړ ډول پرمختګ وکړي. د افغانستان اسلامي امارت پر دې باور دی کهچېرې نړیوال سازمانونه او مرستندویه ادارې د تضاد پر ځای مثبت تعامل ته مخه او له افغانستان سره د پراختیایي پروژو د تمویل په برخه کې همکاري وکړي، په پایله کې به یې نوي کاري فرصتونه رامنځته او د هېواد په اقتصادي وضعیت به مثبت تاثیر وکړي.
د افغانستان اسلامي امارت
د ریاست الوزراء اقتصادي معاونیت