د افغانستان او ایران ترمنځ د سوداګرۍ د زیاتوالي په موخه د ګډو کمېټو لومړنۍ ناستې ترسره شوې
د افغانستان او ایران ترمنځ د ټاکل شویو ګډو کمېټو لومړنۍ ناستې ترسره او د دواړو هېوادونو د سوداګریزو او ترانزیټي اړیکو د پراخوالي او په دغه برخه کې د شته ستونزو د له منځه وړلو په موخه د مخکینیو توافقاتو په اړه خبرې وشوې. دغه ناستې چې د دواړو هېوادونو په سرحدي ګمرکونو کې ترسره شوې د سوداګرۍ او ترانزیټ کچې د زیاتوالي په موخه دواړو لورو توافق وکړ، چې د اسلام کلا، نیمروز او ابو نصر فراهي او د ایران طرف ته د درېیو سرحدي ګمرکونو ترمنځ دې کاري وخت له ۸ ساعتونو څخه ۱۶ ساعتونو ته زیات شي. همدا راز د دواړو هېوادونو ترمنځ د صادراتو او وارداتو د زیاتوالي په موخه توافق وشو څو په ورځني ډول د بار وړونکو موټرونو شمېر له ۵۵۰ څخه ۱۲۰۰ ته لوړ شي. په دغو ناستو کې افغان خاورې ته د ایراني باروړونکو موټرونو شل ورځنی بندیز هم لرې کړل شو. همدارنګه دواړو لورو د سوداګرۍ ودې په موخه ځینې ټاکل شوي فیسونه هم لغوه اعلان کړل. ایران ۱۰۴ ډالر او افغانستان بیا ۵۰۰۰ افغانۍ د خاک پولي فیس لغوه کړ. د یادونې وړ ده چې د دې ناستو موخه څه موده وړاندې ایران ته د ریاستالوزراء اقتصادي مرستیال محترم ملا عبدالغني برادر اخوند د رسمي سفر پرمهال له ایراني چارواکو سره د شویو هوکړو تعقیب دی. ایران ته د ریاستالوزراء اقتصادي مرستیال د رسمي سفر پرمهال د دواړو هېوادونو ترمنځ د سوداګرۍ او ترانزیټ کچې د زیاتوالي په موخه یوشمېر تفاهمنامې لاسلیک شوې وې او د هغو تعقیب لپاره د ګډو کمېټو پر ګومارلو هم هوکړه شوې وه.
