د سړو خونو جوړولو پانګوالو ته پنځه کلن مالياتي معافيت ورکول کېږي
د ریاست الوزراء اقتصادي مرستیال محترم ملا عبدالغني برادر اخوند په مشرۍ اقتصادي کمېسيون غونډه کې د غزني ولایت په مرکز کې د کرنې، اوبولګولو او مالدارۍ وزارت پر ځمکه د سړې خونې او کارخانې د جوړولو طرحه تایید شوه.
افغانستان یو کرنیز هېواد دی، خو د سړو خونو د نشتوالي او ګاونډیو هېوادونو له لوري پر کرنیزو محصولاتو موسمي تعرفو لوړولو او سوداګریزو لارو بندولو يې ملي اقتصاد، کرنیز محصولات او بزګران له مالي زیانونو سره مخ کړي. د یادو ستونزو د مخنیوي په موخه هر هغه شرکت یا انفرادي متشبث چې د سړو خونو جوړولو په برخه کې پانګونه کوي، پنځه کلن مالیاتي معافیت ورکول کېږي.
