د ریاست الوزراء اقتصادي مرستیال د ایران اسلامي جمهوريت د ریل پتلۍ د رئیس په مشرۍ پلاوي سره وکتل
د ریاست الوزراء اقتصادي مرستیال محترم ملا عبدالغني برادر اخوند د روان ۱۴۰۴ لمریز کال د مرغومي میاشتې په اتمه نیټه د ایران د ریل پټلۍ ادارې د رییس جبار علي ذاکري په مشرۍ له راغلي پلاوي سره په مرمرینه ماڼۍ کې په داسې حال کې وکتل چې په کابل کې د ایران سفیر هم حاضر و.
په دې لیدنه کې دواړو لورو د افغانستان او ایران ترمنځ پر اقتصادي اړیکو، سوداګرۍ او د ریل پټلۍ د پراختیا په برخه کې د همکارۍ په اړه خبرې وکړې.
د ایران اسلامي جمهوريت د ریل پټلۍ رییس جبار علي ذاکري وویل، غواړي د افغانستان له لارې د ریل پټلۍ ته پراختیا ورکړي، څو له دې لارې له چین او چین د افغانستان له ستراتیژیک موقعیت څخه په استفادې له اروپا سره وصل شي. هغه وړاندیز وکړ چې په دې برخه کې یوه ګډه کمیټه جوړه شي او له شرکتونو سره خبرې وشي.
ورپسې د ریاست الوزراء اقتصادي مرستیال وویل چې د دې پروژې د ارزښت په اړه یې درې کاله مخکې د ایران اسلامي جمهوريت د ولسمشر له مرستیال سره خبرې کړې وې او د دې پروژې د اقتصادي ارزښت په اړه یې معلومات ورکړي و. د ریاست الوزراء اقتصادي مرستیال زیاته کړه چې په دې برخه کې دې مشترکه کمیټه جوړه او هرڅو مره ژر چې کیږي عملي کار دې پيل شي.
