د ریاستالوزراء اقتصادي مرستیال محترم ملا عبدالغني برادر اخوند د ترکمنستان د بهرنیو چارو له وزیر سره د ویډیو کنفرانس له لارې خبرې وکړې
د ریاستالوزراء اقتصادي مرستیال محترم ملا عبدالغني برادر اخوند د روان لمریز کال د اسد میاشتې په ۱۸مه نېټه د ویډیو کنفرانس له لارې د ترکمنستان د بهرنیو چارو وزیر سره پر دوه اړخیزو سیاسي، اقتصادي او سوداګریزو همکاریو سربېره د افغانستان په خاوره کې د ټاپي پروژې د عملي کېدو د لارو چارو، تورغنډۍ بندر کې د رېل پټلۍ سټېشن د پراختیا، ترانزیټ او ټرانسپورټ کې د اسانتیاوو د رامنځ ته کولو په اړه هراړخیزې خبرې وکړې. د ریاستالوزراء اقتصادي مرستیال د خپلو خبرو پر مهال وویل، اسلامي امارت او ترکمنستان په سیاسي او اقتصادي برخه کې ښې اړیکې لري او دواړه لوري باید د دغو اړیکو د لا پراختیا لپاره هڅې وکړي. محترم ملا صاحب زیاته کړه، افغانستان او ترکمنستان په مختلفو برخو کې مشترکې ګټې لري چې اوسمهال یې د ترلاسه کولو لپاره ښه زمینه برابره شوې ده. د محترم ملا صاحب په خبره، د افغانستان اسلامي امارت اقتصاد محوره بهرنی سیاست تعقیبوي چې اساسي تمرکز یې پر سیمهییز اتصال دی او دې موخې ته د رسېدو لپاره د سیمې او په ځانګړې توګه ترکمنستان همکارۍ ته اړتیا لري. د ترکمنستان د بهرنیو چارو وزیر د افغانستان او ترکمنستان دوستانه اړیکو ته په اشارې سره وویل، هېواد یې چمتو دی چې له افغانستان سره د خپلو سیاسي او اقتصادي اړیکو پراخولو په موخه په نږدې راتلونکي کې د افغانستان په خاوره کې د ټاپي پروژې کارونه پیل کړي. همداراز نوموړي زیاته کړه چې هېواد یې په پلان کې لري په افغانستان کې د برېښنا او رېل پټلۍ شبکې په برخه کې پانګونه وکړي. محترم ملا صاحب وویل چې دواړه هېوادونه به په مختلفو برخو کې د یو لړ شریکو موضوعاتو په اړه ګډ کار ته ادامه ورکوي، ترڅو د دواړو هېوادونو لپاره له رامنځ ته شوو فرصتونو څخه اعظمي ګټه پورته شي. په پای کې د ترکمنستان بهرنیو چارو وزیر د ریاست الوزراء اقتصادي مرستیال محترم ملا عبدالغني برادر اخوند ته له ترکمنستان څخه د لیدنې بلنه ورکړه تر څو په مناسب وخت کې دغه هېواد ته سفر وکړي.
