د ریاستالوزراء اقتصادي مرستیال محترم ملا عبدالغني برادر اخوند په مشرۍ په کابل ښار کې د سوالګرو راټولولو کمېټې د غړو وزارتونو او ادارو ترمنځ په مرمرینه ماڼۍ کې ګډه غونډه ترسره شوه
د ریاستالوزراء اقتصادي مرستیال محترم ملا عبدالغني برادر اخوند په مشرۍ د روان لمریز کال د عقرب میاشتې په ۶مه نېټه په کابل ښار کې د سوالګرو راټولولو کمېټې د غړو وزارتونو او ادارو ترمنځ په مرمرینه ماڼۍ کې ګډه غونډه ترسره شوه. محترم ملا صاحب ټینګار وکړ چې له کابل ښار څخه دې په بشپړ ډول سوالګر راټول شي او تر ارزونې وروسته دې بې سرپرسته مستحقو سوالګرو ته په دوامدار ډول د نقدو او خوراکي توکو د مرستو رسولو لړۍ جاري وساتل شي. محترم ملا صاحب زیاته کړه چې اسلامي امارت د غریبو هېوادوالو او په ځانګړي ډول د سوالګرو ستونزو ته رسېدنه کوي او هڅه کوي چې د هغوی ستونزې حل او د یو سوکاله ژوند زمینه ورته برابره کړي. همدا راز محترم ملا صاحب د دغه کمېټې ټولو مسوولینو او په ځانګړي ډول د اطلاعاتو او کلتور وزارت ته لارښوونه وکړه څو د یادې کمېټې د کړنلارې مطابق خپل مسوولیتونه په ښه ډول ترسره کړي. په کابل ښار کې د سوالګرو راټولولو کمېټې له لوري پرېکړه وشوه، چې د ارشاد، حج او اوقافو وزارت دې د جمعې لمانځه په خطبو کې د دغه عمل د دنیوي او اخروي زیانونو په اړه خلکو ته عامه پوهاوی ورکړي او د دغه پروسې مؤثریت په موخه دې خپل استازي یادې کمېټې ته ورمعرفي کړي.
