د ریاستالوزراء اقتصادي مرستیال د آذربایجان هېواد د لومړي وزیر له مرستیال سره وکتل
د ریاستالوزراء اقتصادي مرستیال محترم ملا عبدالغني برادر اخوند ازبیکستان ته د خپل سفر پر مهال «د ترمذ نړیوال سوداګریز مرکز» د پرانیستې په مناسبت د جوړو شوو مراسمو په څنډه کې د آذربایجان هېواد د لومړي وزیر له مرستیال سره وکتل. د ریاستالوزراء اقتصادي مرستیال د دغه لیدنې پر مهال په کابل کې د دغه هېواد د سفارت د فعالیت له پيل مننه وکړه او د آذربایجان له حکومت او خصوصي سکټور څخه یې وغوښتل چې په افغانستان کې د پانګونې په برخه کې د رامنځته شوو فرصتونو څخه په استفادې دلته په بېلابېلو برخو کې پانګونه وکړي. د محترم ملا صاحب په خبره، اسلامي امارت یې بشپړ ملاتړ کوي او په دغه برخه کې یې ټولې اړینې اسانتیاوې رامنځته کړې دي. د آذربایجان د لومړي وزیر مرستیال د خپلو خبرو پرمهال وویل، هېواد یې چمتو دی چې له افغانستان او سیمې هېوادونو سره د خپلو سوداګریزو اړیکو د پراخولو په موخه د لاجوردو لاره بېرته فعاله او همدا راز افغانستان ته د سوداګرۍ په برخه کې د خپلو صادراتو او وارداتو کچه هم لوړه کړي. هغه په افغانستان کې د صنعتي فابریکو د رامنځته کولو په برخه کې پانګونې ته لېوالتیا وښوده او وویل، دوی چمتو دي چې د کانونو د استخراج په برخه کې هم له اسلامي امارت سره ګډ کار وکړي. د غونډې په پای کې ټینګار وشو چې دواړه لوري به په یادو برخو کې ګډو همکاریو ته دوام ورکوي.
