د رياست الوزراء اقتصادي مرستیال محترم ملا عبدالغني برادر اخوند د روان کال د میزان میاشتې په ۲۸مه نیټه د نفت او ګازو په برخه کې د ترکمنستان د کابینې له مرستیال باتور امانوف سره وکتل.
د نفت او ګازو په برخه کې د ترکمنستان د کابینې مرستیال د افغانستان په خاوره کې د ټاپي پروژې د کاري پرمختګونو په اړه معلومات شريک کړل. نوموړي وویل، اوسمهال د افغانستان په خاوره کې د ټاپي پروژې چارې ۱۴ کيلومتره پرمخ تللې دي او ۷۰ کيلومتره نوره فاصله هم د پايپ غځولو لپاره چمتو شوې ده.
هغه زیاته کړه، د ۳۰ کيلومترو لپاره پايپونه جوړ شوي چې په راتلونکې مېاشت کې به يې د نصب او غځولو چارې بشپړې شي.
د نوموړي په خبره چې د افغانستان په خاوره کې د ټاپي پروژې کارونه په ښه ډول روان دي او اسلامي امارت ورته هر ډول اسانتياوې برابرې کړې دي. د نفت او ګازو په برخه کې د ترکمنستان د کابینې مرستیال داهم وویل چې په راتلونکي يو کال کې به په افغانستان کې ددغه مهمې سيمه ييزې پروژې چارې بشپړې کړي.
محترم ملا صاحب د ټاپي پروژې په برخه کې د ترسره شوو کارونو ستاينه وکړه او د پروژې د چارو پر کيفيت يې ټينګار وکړ
