د کان کیندنې پروژو کې له کورنیو سرچینو څخه د ګټې اخیستنې پالیسۍ مسوده د تایید وړ وبلل شوه
د اقتصادي کمېسیون د تخنیکي کمېټې نوبتي غونډه د روان ۱۴۰۴ لمریز کال د عقرب میاشتې په ۱۲مه نېټه په مرمرینه ماڼۍ کې ترسره شوه. دې غونډې ته د کانونو او پټرولیم وزارت له لوري د کان کیندنې پروژو کې له کورنیو سرچینو څخه د ګټې اخیستنې پالیسۍ مسوده د بحث لپاره وړاندې شوه. له هراړخیزې ارزونې وروسته یاده مسوده د تایید وړ وبلل شوه او د نهايي تصمیم نیونې لپاره اقتصادي کمېسیون ته راجع شوه.
د دې پالیسۍ په تطبیق سره به د کان کیندنې برخې د کاري ځواک فني او حرفوي مهارتونه لوړ شي، د کان کیندنې په پروژو کې به دوامداره کاري فرصتونه رامنځته شي، د کان کیندنې په پروژو کې به له کورنیو سرچینو څخه ګټه اخیستنه زیاته او پر وارداتو به تکیه راکمه او همداراز به د کورنیو صنایعو او سیمه ییز اقتصاد ودې ته زمینه برابره شي.
همداراز په دې غونډه کې د یوشمېر نورو موضوعاتو په اړه هم بحث ترسره او په اړه یې اړوندو ادارو ته لازمې سپارښتنې وشوې.
