په لغمان کې د سوداګریز مارکېټ او په اسلام کلا بندر کې د سوداګریز کمپلکس جوړولو طرحې د تایید وړ وبلل شوې
د پانګونې بینالوزارتي کمېټې نوبتي غونډه د روان ۱۴۰۴ لمریز کال د سرطان میاشتې په ۲۴مه نېټه په مرمرینه ماڼۍ کې ترسره شوه. غونډې ته له اجنډا سره سم په لغمان ولایت کې د کرنې، اوبولګولو او مالدارۍ وزارت پر ځمکه د سوداګریز مارکېټ جوړولو او د هرات ولایت په اسلام کلا بندر کې د سوداګریز کمپلکس جوړولو طرحې د تاییدۍ لپاره وړاندې شوې. له هراړخیزې ارزونې وروسته یادې طرحې د پانګونې بینالوزارتي کمېټې له لوري د تایید وړ وبلل شوې.
دې غونډې ته په کابل ښار کې د سوداګریز او استوګنیزو مارکېټ جوړولو او همداراز د هېواد د اقتصادي ودې لپاره د ستراتیژیک چوکاټ جوړولو طرحې هم د بحث لپاره وړاندې شوې. د یادو طرحو د هراړخیزې ارزونې لپاره کمېټې وټاکل شوې، څو په ټاکلي وخت خپل راپورونه د پانګونې بینالوزارتي کمېټې سره شریک کړي
