په جوزجان ولایت کې د سوداګریز مارکیټ جوړولو طرحه د تایید وړ وبلل شوه
د پانګونې بینالوزارتي کمېټې نوبتي غونډه د روان ۱۴۰۴ لمریز کال د سنبلې میاشتې په ۱۱مه نېټه په مرمرینه ماڼۍ کې جوړه شوه. غونډې ته له اجنډا سره سم د جوزجان ولایت په مرکز شبرغان ښار کې د ښاروالۍ پرځمکه د سوداګریز مارکېټ د جوړولو طرحه وړاندې شوه. د دې طرحې له مخې خصوصي سکټور د ښاروالۍ پر ۲۲۰۰ متره مربع ځمکه پنځه پوړیز سوداګریز مارکیټ جوړوي چې دوکانونه او د موټرو پارکېنګ به ولري. یاده طرحه د پانګونې بین الوزارتي کمېټې له خوا د تعدیل په راوستلو سره د تایید وړ وبلل شوه او د نهايي تصمیم په موخه اقتصادي کمیسیون ته راجع شوه.
د پانګونې بین الوزارتي کمېټې غونډې ته د خصوصي سکټور له خوا په هېواد کې د ننه د بریښنایي وسایلو او تجهیزاتو د تولید د فابریکې د جوړولو، په جوزجان ولایت کې د کورنیو چارو وزارت پر ځمکه د خصوصي سکټور له خوا د مارکیټ جوړولو او د یوه خصوصي شرکت له خوا د نوي کابل په ښار کې د پانګونې طرحې وړاندې شوې. له هر اړخیز بحث وروسته اړوندو ادارو ته دنده وسپارل شوه چې یادې طرحې دې په هر اړخیز ډول وڅیړي او خپل راپور دې په ټاکلي وخت د پانګونې بین الوزارتي کمېټې سره شریک کړي.
