له محترم ملا عبدالغني برادر اخوند سره ډاکټر زلمي خلیلزاد وکتل
د ریاستالوزراء اقتصادي مرستیال محترم ملا عبدالغني برادر اخوند سره، نن (دوشنبه) د ۱۴۰۵ کال د سنبلې میاشتې په ۱۶مه نېټه، په خپل کاري دفتر کې د افغانستان لپاره د امریکا متحده ایالاتو پخواني ځانګړي استازي ډاکټر زلمي خلیلزاد ولیدل. د دې لیدنې پر مهال د سیمې په وضعیت، په افغانستان کې د ښې حکومتولۍ او زیربناوو په برخه کې د ترسره شوو پرمختګونو او په افغانستان کې په مختلفو سکټورونو کې د بهرنیو شرکتونو لپاره د پانګونې پر موجودو فرصتونو خبرې وشوې.
ښاغلي خلیلزاد د خپلو خبرو پر مهال وویل، په افغانستان کې په مختلفو برخو کې پرمختګونه شوي او د بهرنۍ پانګونې د جلب او جذب لپاره ښه زمینه برابره شوې ده. هغه زیاته کړه، د سعودي عربستان، قطر، اذربایجان او ناروې یوشمېر شرکتونه لېواله دي، چې په افغانستان کې په مختلفو برخو په ځانګړي ډول د نفت او ګازو په اکتشاف او استخراج کې پانګونه وکړي.
د ریاستالوزراء اقتصادي مرستیال په افغانستان کې د یادو هېوادونو د شرکتونو د پانګونې له لېوالتیا هرکلی وکړ او ویې ویل، چې د افغانستان اسلامي امارت ټولو پانګوالو ته ګڼې اسانتیاوې رامنځته کړي دي او هر ډول همکاري او ملاتړ یې کوي.
