د پانګونې بینالوزارتي کمېټې له لوري د برېښنايي ویزې سیسټم جوړولو پر طرحه بحث وشو
د پانګونې بینالوزارتي کمېټې درېیمه نوبتي غونډه په مرمرینه ماڼۍ کې ترسره او له اجنډا سره سم د وړاندې شوو طرحو په اړه هراړخیز بحث وشو. یادې ناستې ته د نورو موضوعاتو ترڅنګ د بهرنیو چارو وزارت لپاره د برېښنايي ویزې سیسټم جوړولو په برخه کې د پانګونې طرحه د خصوصي سکټور له لوري وړاندې شوه، چې له هر اړخیز بحث وروسته د بهرنیو چارو او کورنیو چارو وزارتونو له استازو څخه ګډې کمېټې ته دنده وسپارل شوه، څو د یادې طرحې د حقوقي، تخنیکي او اقتصادي تحلیلونو او د دې ناستې د وړاندیزونو په نظر کې نیولو سره د طرحې وړاندې کوونکي شرکت له استازو سره بیا ځل ناستې ترسره کړي او راپور یې د دوه اوونیو په جریان کې د پانګونې بینالوزارتي کمېټې پنځمې نوبتي ناستې ته راوړي.
