د کارګرانو د ملي اتحادیې د جایدادونو، اساسنامې، د جوازونو ورکړې او یوشمېر نورو موضوعاتو په اړه بحث وشو
د اقتصادي کمېسیون د تخنیکي کمېټې په نوبتي غونډه کې چې د روان لمریز کال د سلواغې میاشتې په ۱۶مه نېټه په مرمرینه ماڼۍ کې جوړه شوې وه، له اجنډا سره سم د یوشمېر اقتصادي موضوعاتو په اړه بحث وشو. یادې غونډې ته د کمال خان بند د دوهم فاز د امکان سنجۍ د لومړنیو مطالعاتو بشپړ راپور وړاندې شو. په غونډه کې تر هراړخیز بحث وروسته د اوبو او انرژۍ او کرنې، اوبولګولو او مالدارۍ وزارتونو او د ملي پراختیا شرکت له استازو څخه جوړې شوې کمېټې ته دنده وسپارل شوه، څو د ترسره شوو مطالعاتو په پام کې نیولو سره د امکان سنجۍ دقیق تخنیکي مطالعات ترسره او راپور یې دې د اقتصادي کمېسیون تخنیکي کمېټې ته وړاندې کړي. همدارنګه د اقتصادي کمېسیون د تخنیکي کمېټې له لوري د هرات – خواف د اوسپنې پټلۍ د څلورمې قطعې پروژې د لومړي فاز د جوړولو پر مالي تمویل خبرې وشوې. د موضوع تر هراړخیزې ارزونې وروسته پرېکړه وشوه چې مالیې وزارت دې د یادې پروژې لپاره د بودیجې ترلاسه کولو په موخه د افغانستان اسلامي امارت د مشرتابه عالي مقام ته ځانګړی وړاندیز وکړي. دغه پرېکړه د نهايي تصمیم نیونې په موخه اقتصادي کمېسیون ته راجع شوه.
