د افغانستان او ازبیکستان ترمنځ د ۲.۵ میلیارد ډالرو په ارزښت ۳۵ تفاهمنامې لاسلیک شوې
د ریاستالوزراء اقتصادي مرستیال محترم ملا عبدالغني برادر اخوند او د ازبیکستان لومړي وزیر محترم عبدالله عارف اوف په حضور کې د روان ۱۴۰۳ لمریز کال د اسد میاشتې په ۲۷مه نېټه د افغانستان د نړیوال نندارتون په مرکز کې د ۲.۵ میلیارد ډالرو په ارزښت ۳۵ تفاهمنامې لاسلیک شوې. د یادو تفاهمنامو د لاسلیک په مراسمو کې د دواړو هېوادونو مسوولینو او د خصوصي سکټور استازو هم حضور درلود. په دغو تفاهمنامو کې د ۱.۴ میلیارد ډالرو په ارزښت ۱۲ د پانګونې او همدا راز د ۱.۱ میلیارد ډالرو په ارزښت ۲۳ سوداګریزې تفاهمنامې شاملې دي، چې په پلي کېدو سره به یې د دواړو هېوادونو ترمنځ اقتصادي اړیکې پیاوړې او د سوداګرۍ په کچه کې به د پام وړ زیاتوالی راشي.
