په خوست کې د لس پوړیز سوداګریز مارکېټ جوړولو طرحه د تایید وړ وبلل شوه
د پانګونې بینالوزارتي کمېټې نوبتي غونډه د روان ۱۴۰۴ لمریز کال د اسد میاشتې په اوومه نېټه په مرمرینه ماڼۍ کې ترسره شوه. غونډې ته له اجنډا سره سم په خوست ولایت کې د ښاروالۍ پر ځمکه د لس پوړیز سوداګریز مارکېټ جوړولو طرحه د بحث لپاره وړاندې شوه. له هراړخیزې ارزونې وروسته یاده طرحه د تایید وړ وبلل شوه او د نهايي تصمیم نیونې په موخه اقتصادي کمېسیون ته راجع شوه. د دې طرحې له مخې به خصوصي سکټور د لس پوړیز سوداګریز مارکېټ جوړولو لپاره ۲۳۵ میلیونه افغانۍ پانګونه وکړي، چې سلګونو کسانو ته به په مستقیم او غیر مستقیم ډول د کار زمینه هم برابره کړي.
د پانګونې بینالوزارتي کمېټې دې غونډې ته په بغلان ولایت کې له ډبرو سکرو څخه د برېښنا تولید او په کابل/ لوګر کې د کرنیز کمپلکس (سړې خونې، پروسس او بسته بندۍ مرکز) جوړولو طرحې هم د بحث لپاره وړاندې شوې. د یادو طرحو د هراړخیزې ارزونې په موخه کمېټې وټاکل شوې، څو په ټاکلي وخت خپل راپورونه د پانګونې بینالوزارتي کمېټې ته وړاندې کړي.
