په نږدې راتلونکي کې به د بخش اباد خاکي بند عملي چارې پيل شي
د ریاستالوزراء اقتصادي مرستیال محترم ملا عبدالغني برادر اخوند نن د روان ۱۴۰۴ لمریز کال د میزان میاشتې په لومړۍ نېټه په خپل کاري دفتر کې د فراه ولایت له علماوو او قومي مشرانو سره وکتل. د لیدنې پر مهال د فراه ولایت علماوو او قومي مشرانو د فراه ولسونو د اوبو کمښت، برېښنا او ترانسپورټ په برخو کې موجودې ستونزې شریکې کړې. د ریاستالوزراء اقتصادي مرستیال د یادو ستونزو د حل په موخه د اړوندو وزارتونو او ادارو مسوولینو ته سپارښتنه وکړه، څو د موجوده امکاناتو په صورت کې ورته رسېدنه وکړي.
په ناسته کې يادو مسوولینو ډاډ ورکړ، چې په نږدې راتلونکي کې به د بخش اباد خاکي بند او د فراه ولایت له مرکز تر فراه رود پورې د غځېدلي سړک عملي چارې پیل شي او همداراز به هڅه وکړي، څو د وارداتي برېښنا پر مټ او یا هم د خصوصي سکټور له لوري د لمریزې برېښنا د تولید په برخه کې د پانګونې له لارې د دوی د برېښنا ستونزه حل کړي.
