الحاج ملا عبدالغني برادر اخوند د قوشتیپې کانال وروستي کارونه له نېږدې وکتل
نېټه: 2022، سپټمبر 22مه
د ریاستالوزراء اقتصادي مرستیال محترم الحاج ملا عبدالغني برادر اخوند د قوشتېپې کانال د وروستیو کاري پرمختګونو د لیدنې په موخه نن (سنبلې میاشتې 31مه) بلخ ولایت ته سفر وکړ. محترم الحاج ملا عبدالغني برادر اخوند د قوشتېپې کانال پروژې کارونه له نېږدې څخه وکتل او د یادې پروژې د مسؤلینو د ترسره شوو کاري پرمختګونو او هڅو له امله يې ستاینه وکړه او هغوی ته یې د کارونو د لا ښهوالي په موخه لازمې سپارښتنې وکړې.
د یادولو وړ ده، چې د یادې پروژې له پیل سره سم زرګونو کسانو ته په مستقیم او غیر مستقیم ډول د کار زمینه برابره شوې. د دې کانال په جوړېدو سره به شاوخوا 550 زره هکټاره ځمکه خړوبه شي، چې افغانستان به د غنمو له پلوه پر ځان بسیا شي.
