چین: ژر به د مس عینک د استخراج کار پيل کړو
نېټه: د 2022 کال د مارچ 24مه
د رياست الوزراء لومړي مرستيال ملا عبدالغني برادر اخوند او ورسره مل هيئت په چهارچنار ماڼۍ کې د چين د بهرنيو چارو له وزير "وانګ يې" او ورسره پلاوي سره وکتل. محترم ملاصاحب وويل، چين او افغانستان خپل منځ کې ښې تاريخي اړيکې لري او اسلامي امارت د دغو اړيکو لا پراختيا غواړي. هغه د خپلو خبرو پر مهال زياته کړه، د ا.ا.ا. چين ته د ټولو هغو اندېښنو د له منځه وړلو په اړه اطمينان ورکوي، چې دوى يې د افغانستان له خاورې څخه د پېښېدو په اړه لري.
ښاغلي وانګيې په افغانستان کې له سرتاسري امنيت ستاينه وکړه او ویې ويل،چين چمتو دى چې له افغانستان سره سوداګريزې اړيکې لا پراخې او دلته د کانونو د استخراج، د اقتصادي زونونو د جوړولو او انرژۍ د توليد په برخه کې پانګونه وکړي.
د چين د بهرنيو چارو وزير همدا راز زياته کړه، چې ژر به د مس عينک کان د استخراج کار هم پيل کړي.
