د ریاست الوزراء اقتصادي مرستیال په مشرۍ لوړپوړی امارتي پلاوی د ایکو سازمان په ۱۷مه سرمشریزه کې د ګډون په موخه اذربایجان ته ولاړ
د سرطان ۱۰مه
د افغانستان اسلامي امارت د ریاستالوزراء اقتصادي مرستیال محترم ملا عبدالغني برادر اخوند په مشرۍ لوړپوړی امارتي پلاوی نن له غرمې مخکې د ایکو (اقتصادي همکارۍ سازمان) په ۱۷مه سرمشریزه کې د ګډون په موخه د اذربایجان هېواد په رسمي بلنه ياد هيواد ته روان شو.
ټاکل شوې محترم ملا عبدالغني برادر اخوند د دغه سفر پر مهال د ایکو سازمان د ۱۷مې سرمشریزې په عمومي غونډه کې د ګډون او وینا تر څنګ د اذربایجان هېواد له یوشمېر چارواکو سره د دواړو هېوادونو ترمنځ په بېلابېلو برخو کې د اړیکو د پراختیا په اړه هم ناستې ولري.
د ایکو (اقتصادي همکارۍ سازمان) ۱۷مه سرمشریزه د دغه سازمان د غړو هېوادونو د ولسمشرانو او لوړپوړو چارواکو په شتون کې د جولای میاشتې په درېیمه او څلورمه نېټه د اذربایجان هېواد په کوربهتوب ترسره کېږي.
