د کابل ښار په لومړۍ ناحیه کې د دوه سوداګریزو مارکېټونو د جوړولو طرحې د تایید وړ وبلل شوې
د پانګونې بینالوزارتي کمېټې نوبتي غونډه د ۱۴۰۵ لمریز کال د سرطان میاشتې په ۱۶مه نېټه په مرمرینه ماڼۍ کې جوړه شوه. غونډې ته د کابل ښار په لومړۍ ناحیه کې د مالیې وزارت اړوند پر ځمکه د دوه سوداګریزو مارکېټونو د جوړولو طرحې د بحث لپاره وړاندې شوې، چې له بحث او هراړخیزې ارزونې وروسته دواړه طرحې د تایید وړ وبلل شوې.
د یادو طرحو له مخې به د لومړۍ ناحیې په منډوي ساحه کې ظاهر شاهي مارکېټ د ۱۶۱ میلیون افغانیو په پانګونې سره په اتو پوړونو کې په معیاري ډول جوړ شي، چې لسګونو هېوادوالو ته به دایمي کاري فرصتونه برابر کړي. همداراز، بل مارکېټ به هم په لومړۍ ناحیه کې د پنځو پوړونو په درلودلو سره په معیاري ډول جوړ شي، چې یوشمېر هېوادوال به پکې پر کار بوخت شي.
