ملا عبدالغني برادر اخوند د افغانستان لپاره د المان حکومت له ځانګړي استازي جاسپر ویک او مل هیئت سره وکتل
نېټه: د 2021 کال د نومبر 18مه
د افغانستان اسلامي امارت د ریاستالوزراء د لومړي مرستیال ملا عبدالغني برادر اخوند په مشرۍ لوړپوړي هیئت نن په ارګ کې د افغانستان لپاره د المان حکومت له ځانګړي استازي جاسپر ویک او مل هیئت سره وکتل او په ځینو مهمو مسایلو یې خبرې وکړې.
په دغه لیدنه کې د معلمینو پر معاشاتو خبرې وشوې او الماني لوري وویل چې دوی به په افغانستان کې د ښوونیز سیستم د پياوړي کولو لپاره خپلو هڅو ته دوام ورکوي. په یاده ناسته کې دواړو لورو د اړیکو پر پياوړي کولو ټینګار وکړ او الماني لوري زیاته کړه چې دوی به کله هم افغانان هیر نه کړي او په نږدې راتلونکي کې به ورسره نورې بشري مرستې هم وکړي.
ملا صاحب هم ډاډ ورکړ چې د دوی مرستې به په شفاف ډول اړمنو خلکو ته رسیږي.
