الحاج ملا عبدالغني برادر اخوند د بدخشان ولایت له علماوو او مشرانو سره وکتل
نېټه: 2022، اکټوبر5مه
د ریاستالوزراء اقتصادي مرستیال الحاج ملا عبدالغني برادر اخوند نن په خپل کاري دفتر کې د بدخشان ولایت له یوشمېر علماوو، قومي مخورو او استازو سره وکتل.
محترم ملا صاحب د شل کلن اشغال د ختم او د اسلامي نظام راتلو لپاره د بدخشان ولایت د اوسېدونکو او مجاهدینو قربانۍ بې ساري وبللې او زیاته یې کړه، د الله تعالی په نصرت سره اوسمهال په افغانستان کې یو خپلواک اسلامي نظام حاکم دی، چې ټول افغانان یې تر حاکمیت لاندې په ارامۍ سره ژوند کوي.
په دغه لیدنه کې مولوي مجیبالرحمن د نورو په استازیتوب وویل، چې د بدخشان ولس په خپل ټول توان سره په هر حالت کې د افغانستان اسلامي امارت څخه اطاعت او ملاتړ کوي. نوموړي همدارنګه د بدخشان ولایت د اوسېدونکو ستونزې هم د حل په موخه شریکې کړې.
د ریاستالوزراء اقتصادي مرستیال د بدخشان ولایت علماوو او قومي مخورو ته ډاډ ورکړ، چې د نورو ستونزو د حل تر څنګ به په دغه ولایت کې روغتیايي خدماتو د رسېدو په موخه شته روغتون ته هم وسعت ورکړي.
