الحاج ملا عبدالغني برادر اخوند چین ته د هوايي دهلېز له لارې د جلغوزو د صادراتو د بیا پيل پرانیسته وکړه
نېټه: 2022، اکټوبر 10مه
د ریاستالوزراء اقتصادي مرستیال الحاج ملا عبدالغني برادر اخوند، چین ته د هوايي دهلېز له لارې د جلغوزو د صادراتو د بیا پيل پرانیسته وکړه. د ریاستالوزراء اقتصادي مرستیال په همدې تړاو جوړو شوو مراسمو ته وویل: «هوايي دهلېزونه د نړۍ بازارونو ته د افغانستان د تولیداتو په رسولو کې خورا حیاتي ارزښت لري، نو د افغانستان او چین تر منځ دا هوايي دهلېز به د دواړو هېوادونو تر منځ سوداګریزې اړیکې لا مستحکمې او زموږ د جلغوزو تولید او پروسس به پياوړی کړي.»
الحاج ملا عبدالغني برادر اخوند زیاته کړه، نن به د افغانستان د جلغوزو د صادروونکو سوداګرو او کامایر هوايي شرکت د هوکړې له مخې، 20 ټنه جلغوزي د کابل له هوايي ډګره د متحده عربي اماراتو او بیا له هغه ځایه د چین د شانګهای هوايي ډګر ته واستول شي او دا لړۍ به دوام ولري.
محترم ملا صاحب د خپلو خبرو پر مهال وویل، د افغانستان اسلامي امارت هڅه کوي چې د افغانستان هوايي دهلېزونو ته وسعت ورکړي، څو وکولای شو د چین ترڅنګ ترکیې، اروپا، هند او عربي هېوادونو ته هم وچه میوه، زعفران او نور افغاني محصولات د افغانستان په نښان او نامه صادر کړي.
