د ریاست الوزراء د اقتصادي مرستیال محترم الحاج ملا عبدالغني برادر اخوند په مشرۍ پېښو ته د رسېدو کمېسیون ناسته ترسره شوه

نېټه: 2022، اګسټ 27مه

د ریاست الوزراء د اقتصادي مرستیال محترم الحاج ملا عبدالغني برادر اخوند په مشرۍ پېښو ته د رسېدو کمېسیون ناسته وشوه. په یاده ناسته کې هم د تېر په څېر د وروستیو سېلابونو له امله د زیانمنو شوو هېوادوالو د ستونزو پر حل خبرې اترې وشوې. د ریاست الوزراء اقتصادي مرستیال پېښو ته د رسېدو کمېسیون اړوندو ادارو کارونه و ارزول او اړوندو مسؤولینو ته یې سپارښتنه وکړه، چې د طبیعي پېښو د رامنځته کېدو پر مهال دې زیانمنو شوو خلکو ته بېړنۍ مرستې ورسوي. محترم الحاج ملا عبدالغني برادر اخوند پر دې سربېره ټینګار وکړ، چې د ولس خدمت او د هغوی د ستونزو حلول د افغانستان اسلامي امارت لومړیتوب دی او دوی به په پوره ژمنتیا سره دا کار کوي. محترم الحاج ملا عبدالغني برادر اخوند همدارنګه د طبیعي پېښو د رامنځته کېدو پر مهال د مرستو په وېش کې هم د شفافیت ټینګار وکړ او زیاته یې کړه، چې اړوند وزارتونه او ادارې باید په ډېر شفاف ډول زیانمنو شوو ته مرستې تقسیم کړي. د ریاست الوزراء اقتصادي مرستیال محترم الحاج ملا عبدالغني برادر اخوند پېښو ته د رسېدو کمېسیون ټولو ارګانونو ته سپارښتنه وکړه، چې په راتلونکي کې دې د طبیعي پېښو د رامنځته کېدو پر مهال هېوادوالو ته د مرستو رسولو لپاره پوره چمتووالی ونیسي. پېښو ته د رسېدو کمېسیون غړو وزارتونو او ادارو وویل؛ هغه ولایتونو کې، چې سېلابونو خلکو ته زیانونه اړولي دي په وخت د مرستې ټیمونه لېږلي او تر ډېره یې له زیانمنو شوو خلکو سره لومړنۍ مرستې کړې دي. د یادولو وړ ده، چې د تېرې یوې میاشتې په جریان کې په هېواد کې د راغلو سېلابونو له امله ۱۹۴ کسان شهیدان او ۲۶۵ ټپيان شوي، ۶ لکه جریبه کرنیزه ځمکه تخریب شوې، په زرګونو څاروي له منځه تللي او په سلګونو کانالونه، کارېزونه، کوچني بندونه او استنادي دېوالونه خراب شوي دي.