مسعود دقیق: چمتو یم چې په افغانستان کې په بشري او پراختیايي برخو کې کار وکړم
نېټه: د 2022 کال د مارچ 9مه
د ریاستالوزراء لومړي مرستیال ملا عبدالغني برادر اخوند نن په خپل کاري دفتر کې د بشري او پرمختیايي پروژو له افغان متخصص (سلطان مسعود دقیق) سره وکتل. د ریاستالوزراء لومړي مرستیال افغانستان ته د ښاغلي دقیق راتګ وستایه او زیاته یې کړه، چې په افغانستان کې اوسمهال د پانګونې لپاره ښه شرایط برابر شوي او د افغانستان اسلامي امارت له پانګوالو سره هر ډول همکارۍ ته چمتو دی.
سلطان مسعود دقیق چې د بشري او پرمختیايي پروژو په پلي کولو کې له ځانګړو تجربو او مهارتونو برخمن دی وايي، چمتو دی چې له خپل مسلکي او فني ټیم سره په افغانستان کې د بشري مرستو رسولو، روغتیا، د برښنا تولید او د کانونو په استخراج کې پانګونه وکړي. نوموړي له دې مخکې د ډېریو عربي هیوادونو په ګډون په افریقا کې د المان او اروپايي ټولنې لویې پرمختایي پروژې پلې کړې دي.
ښاغلی دقیق وایي، خوشاله یم چې له لسیزو جګړو وروسته په افغانستان کې سرتاسري امنیت ټینګ شوی او د هیواد له اصلي مالکانو سره ګورم. نوموړی زیاتوي، د تېرو حکومتونو پر مهال هېڅ چمتو نه و چې په افغانستان کې کار وکړي. د دقیق په خبره، ځکه هغه وخت په افغانستان کې فساد اوج ته رسېدلی و او هرڅه کاذبه بڼه پيدا کړې وه.
ښاغلي سلطان مسعود دقیق د ریاستالوزراء له لومړي مرستیال سره د خپلو خبرو پر مهال زیاته کړه، چې اوس په ډېرې لېوالتیا سره غواړي چې په افغانستان او په تېره بیا په لرې پرتو سیمو کې چې تر ډېره لومړني خدمات په ښه بڼه نه ورته رسېږي، له خپل ټیم سره یوځای کار وکړي.
د ریاستالوزراء لومړي مرستیال ملا عبدالغني برادر اخوند سلطان مسعود دقیق ته د هر ډول همکارۍ او بشپړ امنیت ډاډ ورکړ او زیاته یې کړه، اسلامي امارت په ټول توان د افغانستان د پر ځان بسیاینې لپاره هڅې کوي.
سلطان مسعود دقیق چې اصلاً د کندهار ولایت اوسېدونکی دی، له ۳۸ کاله جلا وطنۍ وروسته تازه خپل هیواد ته راستون شوی دی.
