ملا عبدالغني برادر اخوند د جنوب-غرب زون د اسلامي او ملي پولیسو له ښوونیز او روزنیز مرکز څخه لیدنه وکړه
نېټه: 2022 کال، جون 13
د افغانستان اسلامي امارت د رياستالوزراء اقتصادي مرستیال ملا عبدالغني برادر اخوند کندهار ولایت ته د خپل سفر پر مهال د جنوب-غرب زون د کندهار د اسلامي او ملي پولیسو له ښوونیز او روزنیز مرکز څخه لیدنه وکړه. په پیل کې ملا عبدالغني برادر اخوند د اسلامي نظام پر اهمیت خبرې وکړي او مجاهدینو ته یې وویل چې اوسنی نظام د شهیدانو د پاکو وینو په برکت رامنځته شوی دی. هغه زیاته کړه، دا چې افغانستان د کفارو له اشغاله خلاص شو او اوس یې بشپړ حاکمیت د اسلامي امارت له مجاهدینو سره دی، نو لکه څنګه چې د کفارو په مقابل کې جنګ فرض و، داسې د دغه نظام ساتنه هم فرض ده. د رياستالوزراء اقتصادي مرستیال مجاهدینو ته په خطاب کې وویل: مشران دې په کشرانو شفقت او کشران دې د خپلو مشرانو درناوی وکړي او همدارنګه باید د یتیمانو او شهیدانو د کورنیو پوښتنه وکړي. ملا عبدالغني برادر اخوند زیاته کړه: د اسلامي نظام راتګ او بریا یوازې د اسلامي امارت د مجاهدینو نه، بلکې د ټول ولس بریا ده. همدغه ولس و، چې د اسلامي نظام د راتګ لپاره یې هر ډول ستونزې او کړاوونه وګالل.