ملا عبدالغني برادر اخوند د صنعت او معدن خونې له مسؤلینو سره وکتل
نېټه: د 2021 کال د ډسمبر29مه
د ریاستالوزراء لومړي مرستیال ملا عبدالغني برادر اخوند د افغانستان د صنعت او معدن خونې له مسؤلینو سره وکتل. محترم ملاصاحب د هیواد د اقتصادي پياوړتیا او د بېکارۍ کچې په له منځه وړلو کې د خصوصي سکتور رول مهم وباله او زیاته یې کړه: « خصوصي سکتور په پنځو زرو فابریکو کې نږدې یو نیم میلیون کسانو ته د کار زمینه برابره کړې، چې د افغانستان اسلامي امارت یې د فعالیت ستاینه کوي.»
د صنعت او معدن خونې رئیس شیرباز کمینزاده وویل: «د دایمي ځمکې نه درلودل، د برښنا پرچاوي، له بانک څخه د پیسو ایستل او له هیواده بهر د خصوصي سکتور تولیداتو ته د ښه بازار نشتون هغه څه دي، چې دوی یې له ستونزو سره مخ کړي.»
محترم ملا صاحب د افغانستان اسلامي امارت اړوندو ارګانونو ته سپارښتنه وکړه چې د یادو ستونزو د حل په موخه دې له خصوصي سکتور سره په ګډه کار وکړي.
