ملا عبدالغني برادر اخوند په خپل کاري دفتر کې له ایراني لوړپوړي هیئت سره وکتل
نېټه: د 2021 کال د نومبر 15مه
د افغانستان اسلامي امارت د ریاستالوزراء د لومړي مرستیال محترم ملا عبدالغني برادر اخوند په مشرۍ یو لوړپوړي هیئت د اسلامي جمهوري ایران له یو عالي هیئت سره وکتل. په یاده مهمه لیدنه کې پر سیاسي، تعلیمي، اقتصادي، مالي، اوبو او انرژۍ، د فوائد عامه پر امورو، د مهاجرینو پر چارو، د ولاړو پروژو پر بیا پیلېدلو او یولړ نورو موضوعاتو بحث وشو.
په دغه لیدنه کې په افغانستان کې رامنځته شوی فرصت مهم وبلل شو او ټینګار وشو چې باید په پوره ډول استفاده ترې وشي.
محترم ملا صاحب د مهاجرینو د کوربهتوب له امله له ایران هیواد څخه مننه وکړه او دواړو لوریو د دوو ګاونډیو هیوادونو تر منځ د اړیکو پر لا پیاوړي کولو ټینګار وکړ.
