د ریاستالوزراء اقتصادي مرستیال د «جامعه فتح العلوم کابل» مدرسې د حافظانو د دستاربندۍ په مراسمو کې ګډون وکړ
د ریاستالوزراء اقتصادي مرستیال محترم ملا عبدالغني برادر اخوند د روان ۱۴۰۳ لمریز کال د جدې میاشتې په ۲۰مه نېټه د جامعه فتح العلوم کابل مدرسې د دستاربندۍ په مراسمو کې ګډون او وینا وکړه. د دستاربندۍ په یادو مراسمو کې د اسلامي امارت یوشمېر مسوولینو، علماوو کرامو، مشایخو او د سیمې اوسېدونکو هم ګډون کړی و.
د ریاستالوزراء اقتصادي مرستیال په یادو مراسمو کې د خپلې وینا پر مهال وویل، دا د ویاړ ځای دی چې زموږ په هېواد کې د علم او پوهې مرکزونه فعال او اباد دي او د ولس بچي خپله برخه علم ترې اخلي. الله تعالی دې دا هېواد او ولس په علم او پوهې سره ودان لري. محترم ملا صاحب د دیني مدرسو ټولو استادانو ته سپارښتنه وکړه، څو په ډېر شفقت او پوره محنت سره د هېواد بچیانو ته تدریس وکړي، ځکه دوی د علم د زده کړې په موخه هر ډول زحمت ګاللی او ګالي.
د ریاستالوزراء اقتصادي مرستیال محترم ملا عبدالغني برادر اخوند له جامعه فتح العلوم کابل مدرسې څخه فارغ شوو حافظانو او د هغوی کورنیو ته مبارکي وویله او له دوی څخه یې هیله وکړه چې له خپل علم څخه د دین، هېواد او د دې شریف ولس د خدمت لپاره ګټه واخلي.
