محترم ملا عبدالغني برادر اخوند د ازبیکستان هېواد له یوشمېر پانګوالو سره وکتل
د ریاستالوزراء اقتصادي مرستیال محترم ملا عبدالغني برادر اخوند د روان ۱۴۰۳ لمریز کال د چنګاښ میاشتې په ۱۱مه نېټه په خپل کاري دفتر کې له یوشمېر ازبیکستاني پانګوالو سره وکتل. د دغه لیدنې پر مهال ازبیکستاني پانګوالو په افغانستان کې د ډبرو سکرو د استخراج او پروسس، له ډبرو سکرو څخه د برېښنا د تولید، د نفتو د معیاري چاڼخونې جوړولو، د سیمنټو د تولید فابریکې جوړولو، د مالګې کانونو د استخراج او معیاري پخې مالګې د تولید، د معیاري نساجي فابریکې رامنځته کولو او همدا راز د برېښنایي حکومتولۍ په برخو کې پانګونې ته لېوالتیا وښوده. همدارنګه ازبیکستاني پانګوالو زیاته کړه، چې افغانستان د پانګونې لپاره په یو مناسب هېواد بدل شوی او دوی له بشپړ چمتووالي سره راغلي څو په یادو برخو کې پانګونه ترسره او خپلې تجربې له افغانانو سره شریکې کړي. ورپسې د ریاستالوزراء اقتصادي مرستیال په افغانستان کې په مختلفو سکټورونو کې پانګونې ته د ازبیکستاني پانګوالو له لېوالتیا څخه مننه وکړه او دوی ته یې ډاډ ورکړ، چې وزارتونه او ادارې به په خپلو اړوندو برخو کې له دوی سره همکاري وکړي.
