په کابل ښار کې د استوګنیز ښارګوټي او سوداګریزو مارکېټونو د جوړولو پر طرحو بحث وشو
د پانګونې بینالوزارتي کمېټې نوبتي غونډه د روان ۱۴۰۵ لمریز کال د ثور میاشتې په لومړۍ نېټه په مرمرینه ماڼۍ کې ترسره شوه. دې غونډې ته د کابل ښار په لومړۍ ناحیه کې له سپاهي ګمنام څلورلارې تر جاده میوند او له جاده میوند تر پل یک پیسهګي پورې تر ځمکې لاندې د سوداګریز مارکېټ، د کابل ښار په لومړۍ ناحیه کې د سوداګریز مارکېټ او همدارنګه د کابل ښار په اتمه ناحیه کې د طلايي ښارګوټي شا ته د کابل ښاروالۍ پر ځمکه د استوګنیز ښارګوټي د جوړولو طرحې د بحث لپاره وړاندې شوې.
له بحث وروسته یادې طرحې اړوندو ادارو ته د تخنیکي او مالي ارزونو لپاره راجع شوې او سپارښتنه ورته وشوه، چې خپل راپورونه په ټاکلو نېټو د پانګونې بینالوزارتي کمېټې ته وړاندې کړي.
