د ځانګړو اقتصادي حلقو (زونونو) د رامنځته کولو کاري پلان تایید شو
د ریاستالوزراء اقتصادي مرستیال محترم ملا عبدالغني برادر اخوند له لوري نن (چهارشنبه)، د ۱۴۰۵ کال د عقرب میاشتې په ۲۰مه نېټه، په هېواد کې د ځانګړو اقتصادي حلقو (زونونو) د رامنځته کولو کاري پلان تایید شو.
دغه ځانګړې اقتصادي حلقې د عالیقدر امیرالمؤمنین شیخ صاحب حفظه الله د حکم پر اساس په کابل، بلخ، ننګرهار، کندهار، هرات، پکتیا او کندز ولایتونو کې جوړيږي. د پلان پر بنسټ، د صنعت او سوداګرۍ وزارت به د نورو اړوندو وزارتونو او ادارو په همکارۍ د یادو حلقو لپاره ځمکه تثبیت، سکټوري فعالیتونه او د اړتیا وړ خدمات به تشخیص او د پانګونې لپاره به زمینه برابره کړي.
د دغه ځانګړو اقتصادي حلقو په رامنځته کېدو سره به په هېواد کې نوې پانګونه جذب، د صادراتو او وارداتو نسبي توازن او په یو مناسب چاپېریال کې به پر تولیدي فعالیتونو د تمرکز په پایله کې نوی اقتصادي تحول رامنځته شي.
