د ریاستالوزراء اقتصادي مرستیال «افغان انویسټ» شرکت پرانیست
نېټه: 2022، جون 19مه
د رياست الوزراء اقتصادي مرستيال ملا عبدالغني برادر اخوند "افغان انويسټ" محدودالمسٶليت شرکت پرانيست. د ياد شرکت پرانيستو مراسمو ته محترم برادر اخوند وويل: د افغان انويسټ شرکت يوه ښه ځانګړنه دا ده، چې د ټولو قومونو استازي پکې شته. د افغانستان اسلامي امارت او په تېره بيا اقتصادي کمېسيون چې موږ يې په رأس کې يو، د سوداګرو پوره ملاتړ کوي. له موږ سره د اقتصادي کمېسيون په غونډو کې سوداګر عملاً برخه اخلي او په ګډه د دوى ستونزو ته حل پيدا کوو.
د رياست الوزراء اقتصادي مرستيال زياته کړه، الله تعالى موږ ته يو غني هېواد راکړئ، چې ډېر پراخ معدنونه لري. افغان پانګوال بايد ټول په ګډه سره په خپل هېواد کې پانګونه وکړي.
ملا برادر اخوند د خپلو خبرو پر مهال وویل، د هر چا عزت په خپل وطن کې دى، په بل هېواد کې عزت نشته. موږ له ټولو هغو افغان کادرونو او سوداګرو چې په بهر کې دي، غواړو چې خپل وطن ته راشي او دلته په ګډه له خپلو افغان وروڼو سره کار وکړي.
