د متحده عربي اماراتو له لوري د بشري مرستو 38.5 ټنه جوپه چې خوراکي توکي، البسه او ادویه پکې شامل وو، کابل ته را ورسېده
په افغانستان کې د وروستۍ زلزلې له امله له زیانمنو شوو افغانانو سره د بشري مرستو په دوام د روان 1402 لمریز کال حمل میاشتې په 11مه نېټه باندې د متحده عربي اماراتو له لوري د بشري مرستو 38.5 ټنه جوپه چې خوراکي توکي، البسه او ادویه پکې شامل وو، کابل ته را ورسېده. د ریاستالوزراء اقتصادي معاونیت ځانګړی سکرتر مولوي عبدالله عزام وايي، را رسېدلې مرستې به اړوندو وزارتونو او ادارو ته تسلیم شي څو یې د وروستۍ زلزلې له امله پر زیانمنو شوو او اغېزمنو هېوادوالو په شفاف ډول ووېشي. د ریاستالوزراء اقتصادي معاونیت له بېوزله افغانانو سره د متحده عربي اماراتو د بشري مرستو هرکلی کوي او دا ډول چارې د دواړو هېوادونو ترمنځ د اړیکو د پراخېدو او پياوړي کېدو لامل بولي. د ریاستالوزراء اقتصادي معاونیت ځانګړي سکرتر د خپلو خبرو پر مهال پر نړیوالو غږ وکړ چې پر افغانانو د بندیزونو او فشارونو پر ځای له هغوی سره د دوه اړخیزو اړیکو او تعامل لار غوره کړي.
