د افغانستان له لارې له ترکمنستان څخه پاکستان ته د ګاز او نفتي موادو د ترانزیټ طرحه منظوره شوه
د ریاستالوزراء اقتصادي معاونیت د افغانستان له لارې د ترکمنستان څخه پاکستان ته د ګاز او نفتي موادو د ترانزیټ په اړه د ترانزیټ ملي کمېټې له لوري تایید شوې طرحه د یوې ازمایښتي دورې لپاره منظوره کړه. دغه طرحه د اقتصادي ودې او ترانزیټ د پياوړتیا په موخه جوړه شوې، چې له مخې به یې له مرکزي آسیا څخه سویلي آسیا ته د ګاز او نفتي موادو په ترانزیټ کې د پام وړ اسانتیاوې رامنځته شي. د افغانستان له لارې د مرکزي آسیا څخه سویلي آسیا ته د ګاز او نفتي موادو په ترانزیټ سره به د ملي عوایدو په کچه کې زیاتوالی راشي او پردې سربېره به د هېواد د ترانسپورټ سکټور وده وکړي او هېوادوالو ته به د کار زمینه برابره شي.