د اقتصادي کمېسیون 22مه ناسته ترسره شوه
نېټه: ۲۰۲۲ کال، جون 9مه
د رياست الوزراء د اقتصادي مرستيال ملا عبدالغني برادر اخوند په مشرۍ د اقتصادي کمېسيون په 22مه غونډه کې پر بېلابېلو موضوعاتو مفصل بحثونه وشول. د ماليې وزارت، اوبو او انرژۍ وزارت، د افغانستان بانک او د فراه ولس استازو يوې ګډې کمېټې ته دنده وسپارل شوه، چې د فراه د بخش آباد برښنا بند له نږدې وګوري او د پاتې کارونو په اړه يې راپور د دغه کمېسيون راتلونکي مجلس ته وړاندې کړي. د اقتصادي کمېسيون په ياده غونډه کې همدارنګه ماليې وزارت، مخابراتو او معلوماتي ټکنالوژۍ وزارت او د افغانستان بانک مسلکي استازو ته هدايت وشو، چې له کانونو او پتروليم وزارت سره "د کانونو د استخراج قانون" باندې په ګډه له سره غور وکړي. د دغه قانون پر اساس به له هغو شرکتونو سره تړون کېږي، چې پر مالي توانايۍ سربېره د استخراج ظرفيت هم ولري.
