د لمریزې او بادي برېښنا د تولید، سوداګریزو مرکزونو او کرنیزو کمپلېکسونو د جوړولو طرحو په اړه بحث وشو
د پانګونې بینالوزارتي کمېټې په نوبتي غونډه کې چې د روان ۱۴۰۳ لمریز کال د ثور میاشتې په ۱۱مه نېټه په مرمرینه ماڼۍ کې جوړه شوې وه، د لمریزې او بادي برېښنا د تولید، سوداګریزو مرکزونو او کرنیزو کمپلېکسونو د جوړولو طرحو په اړه بحث وشو. په غونډه کې له اجنډا سره سم د خصوصي سکټور له لوري په هرات ولایت کې د ۵۰ مېګاواټه بادي برېښنا، په بلخ ولایت کې د ۴۰ مېګاواټه لمریزې برېښنا، د غزني ولایت په مرکز کې تر ځمکه لاندې د سوداګریز مارکېټ جوړولو، د هېواد په پنځو زونونو کې د کرنیزو کمپلېکسونو رامنځته کولو او همدارنګه په کابل ښار کې د سوداګریز مارکېټ جوړولو طرحو په اړه هراړخیز بحث وشو. له مفصلو بحثونو وروسته ټاکل شوو کمېټو ته دندې وسپارل شوې، څو د پانګونې بینالوزارتي کمېټې د نظرونو په پام کې نیولو سره د طرحو له وړاندې کوونکو شرکتونو سره د یادو طرحو د مالي، تخنیکي او اقتصادي اړخونو د ارزونې په موخه ګډ مجلسونه وکړي او خپل راپورونه په ټاکلي وخت د پانګونې بینالوزارتي کمېټې ته وړاندې کړي.
