د ریاستالوزراء د اقتصادي مرستیال ساتونکي له څو میاشتنیو نظامي زده کړو وروسته فارغ شول
نېټه: 23 جون، 2022
د رئیسالوزراء او ارګ د ساتنې لوی ریاست د نوي تشکیل له مخې، د 1443 ه.ق کال د ذوالقعدې میاشتې په 23مه نېټه په 313 مرکزي قول اردو کې د ریاستالوزراء د اقتصادي مرستیال ملا عبدالغني برادر اخوند لسګونه ساتونکي له څو میاشتنیو نظامي زده کړو وروسته فارغ شول.
د دغو کمانډویو ځواکونو د فراغت مراسمو کې د ریاستالوزراء اقتصادي مرستیال، د بهرنیو چارو وزارت سیاسي مرستیال شیر محمد عباس ستانکزي او ځینو نورو دولتي چارواکو هم ګډون کړی و.
محترم ملا عبدالغني برادر اخوند فارغینو نظامیانو ته په خبرو کې وویل، نن الحمدالله اشغال ختم شوی، دښمن پوره ماتې خوړلې؛ خو په سیاسي او اقتصادي برخو کې لا هم د دښمن دسیسې پای ته نه دي رسېدلې او په هره ممکنه لاره زموږ پر وړاندې خنډونه جوړوي. خو لکه څنګه مو چې د اشغال په مقابل کې سپېڅلې مبارزه وکړه، همداسې به د دغه هېواد د ساتنې او اقتصاد لپاره هم په پوره مېړانه مبارزه کوو او دا کار ستاسې پر مټ شونی دی.
یادو مراسمو کې ښاغلي شیر محمد عباس ستانکزي وویل، هېڅکله یوه ملت ټولې نړۍ ته يه یوازې ځان ماتې نه ده ورکړې، خو دغه کار د اسلامي امارت مجاهدینو وکړ، چې له دې سره نه یوازې د افغانانو، بلکې د نورې اسلامي نړۍ د بېوزلو مسلمانانو سترګې هم ستاسو پر لوري دي. تاسې به په پوره اخلاص او صداقت سره د دغه هېواد او مظلوم ولس د سر او مال ساتنه کوئ.
د ریاستالوزراء د اقتصادي مرستیال ساتونکو ته د مسلکي نظامي ښوونې او روزنې پر مهال د معیاري عسکري نظام او عامه نظم ساتنې اصول، د نظم او ډسپلین په برخه کې د جمنازیوم لارښوونې، د سپکو او درنو وسلو د تطبیقاتو مهارتونه او مانورونه، نښه ویشتنه او همدارنګه د تعرض او کمین ترڅنګ یو شمیر نور پوځي تمرینونه هم ورکړل شوي دي.
