محترم ملا عبدالغني برادر اخوند د ریاستالوزراء د اقتصادي مرستیال په توګه کابینې ته ور وپېژندل شو
نېټه: د 2022 کال د فبروري 6مه
محترم ملا عبدالغني برادر اخوند د ریاستالوزراء د اقتصادي مرستیال په توګه نن د کابینې غړو، اقتصادي وزارتونو او ټولو مستقلو دولتي شرکتونو ته ور وپېژندل شو.
د ریاستالوزراء اقتصادي مرستیال ملا عبدالغني برادر اخوند وویل: «د تېر ۲۰ کلن اشغال پر مهال د هیواد د اقتصادي ودې لپاره هېڅ بنسټیز کار نه دی شوی او د پراخ فساد له امله یې سخته ضربه لیدلې.» ملاصاحب زیاته کړه، د افغانستان اسلامي امارت د هیواد د اقتصادي بیارغونې لپاره له اړوندو ارګانونو سره په همغږۍ کار کوي او کوښښ کوي چې نور افغانستان پر خپل ځان بسیا واوسي.
د ریاستالوزراء اداري مرستیال مولوي عبدالسلام حنفي په یاده غونډه کې وویل: «د افغانستان اسلامي امارت د ټولو اقتصادي پروژو ملاتړ کوي او هڅه کوي چې فساد له منځه یوسي.»
یادې غونډې ته د کانونو او پترولیم وزیر شیخ شهابالدین دلاور وویل: «افغانستان د کانونو له پلوه غني هیواد دی او اسلامي امارت هڅه کوي چې په ښه ډول دغه کانونه استخراج او د هیواد په اقتصادي بیارغونه کې ترې کار واخلي.»